Самарқандда 25 ёшли қиз ноодатий ўғрилик содир этди (ФОТО)

Самарқанд вилоятида ноодатий ўғрилик содир этилди. Тошкент вилояти Янгийўл туманида яшовчи қиз Самарқанд вилоят Нарпай туманидан юк машинасига Тошкентга бориш учун миниб, ҳайдовчининг пулларини ўғирлаб кетган. Бу ҳақда Самарқанд вилоят ИИБ ахборот хизматига таяниб "Кун" нашри маълум қилган.

«Каттақўрғон тумани Омонбой МФЙда яшовчи, 1995 йилда туғилган Д.Ш. Самарқанд шаҳри бўйича ИИО ФМБга ариза билан мурожаат қилиб, 2020 йил 16 июль куни соат 21:30ларда ўзига тегишли «Камаз» русумли юк автомашинасида Нарпай туманидан Тошкент шаҳрига бориш учун йўлга чиқиб, Оқтош ҳудудидан Тошкент вилояти Янгийўл туманида яшовчи, 1995 йилда туғилган С.У.ни йўловчи сифатида миндиргани ва соат 23:40ларда Самарқанд шаҳар Ўзбек Тракт кўчасида жойлашган Улуғбек шох бекатига етиб келиб, озиқ-овқат харид қилиш учун автомашинадан тушган вақтида С.У. машина ичида бўлган 5 340 АҚШ доллар ва 3 миллион 600 минг сўм миқдоридаги пулларини яширин равишда талон-тарож қилиб, воқеа жойидан яширинганини маълум қилган.

Самарқанд шаҳри бўйича ИИО ФМБ 6-сон ИИБ ходимлари томонидан олиб борилган тезкор тадбирлар натижасида С.У. ушланиб, ундан 800 АҚШ доллари миқдоридаги пуллар ашёвий далил сифатида олинган. 

Мазкур ҳолат юзасидан Самарқанд шаҳри бўйича ИИО ФМБ ҳузуридаги Тергов бўлими томонидан Жиноят кодексининг 169-моддаси (ўғрилик) 2-қисми «б» банди билан жиноят иши қўзғатилиб, дастлабки тергов ҳаракатлари олиб борилмоқда», дейилади Самарқанд вилоят ИИБнинг баёнотида.