Самарқанд триатлон бўйича Осиё кубогига мезбонлик қилади

Самарқанд шаҳри кўркига кўрк қўшиб турган “Боқий шаҳар” мажмуаси атрофида 30дан ортиқ мамлакатнинг 70 нафар атлети Париж-2024 олимпиадасига қимматли рейтинг очколарини қўлга киритиш учун мусобақалашади

Жорий йилнинг 8-9-октябр кунлари кўҳна ва навқирон Самарқанд шаҳри яна бир йирик спорт тадбирига мезбонлик қилади. Жумладан, 8-октябр куни Самарқандда барпо этилган муҳташам “Боқий шаҳар” мажмуаси атрофида, эшкак эшиш канали бўйида триатлон бўйича Осиё кубоги мусобақаси ўтказилади.

Шу муносабат билан, бугун пойтахтимиздаги “Ҳилтон” меҳмонхонасида мазкур мусобақага бағишланган матбуот анжумани ташкил этилди. Унда Спортни ривожлантириш вазири ўринбосари Шаҳрулло Маҳмудов, Миллий Олимпия қўмитаси Бош котиби Ойбек Касимов, Ўзбекистон триатлон федерацияси Бош котиби Елена Кун ҳамда терма жамоамизнинг етакчи аъзоси Александр Курашов, шунингдек ОАВ ходимлари иштирок этишди.

Матбуот анжуманида “Нега Осиё кубоги баҳсларини ўтказиш учун айнан Самарқанд шаҳри танланди?”, деган саволга эса Ўзбекистон триатлон федерацияси бош котиби Елена Кун шундай жавоб берди:

- Халқаро талабларга жавоб берадиган эшкак эшиш каналида триатлоннинг очиқ ҳавзада сузиш мусобақаларини ташкил этиш учун барча шароитлар яратилган. Қолаверса, ушбу спорт мажмуаси атрофидаги югуриш ва велоспорт мусобақаларини ўтказишга мос келадиган йўлаклар ҳам хорижлик меҳмонларни хушнуд этишига ишонаман. Мана шундай шароитларга эга мажмуадан фойдаланмаслик, спортга хиёнат ва Самарқандда ушбу мусобақа юқори савияда ташкил этилишига ишонаман.

Дарвоқе, бу йилги мусобақаларда қатнашиш истагини билдирган спортчилар ўтган йилгига қараганда 3 баравар кўпайганлиги Осиё кубогининг нуфузи тобора ортиб бораётганидан дарак беради.