Рус полицияси ўзбек муҳожирига: "Сизларни камайтириш бўйича юқоридан топшириқ келди"

Фарғоналик 29 ёшли Аброр исмли йигит барча ҳужжатлари жойида бўлишига қарамасдан Санкт-Петербургда маъмурий жавобгарликка тортилди. Уни бир кун совуқ камерада сақлашган. Аброр 30 минг рублга адвокат ёллаб, Тергов қўмитасига полицияга қарши шикоят билан мурожаат қилди, деб хабар берди centralasian.org.

Аброр бир неча йилдан буён Санкт-Петербургда ишлайди. У 11 сентябрь куни полиция томонидан қўлга олинган. Полиция шаҳардаги ресторанлардан бирида ишлайдиган муҳожирдан ҳужжатларини сўраган.

- Мен куръер бўлиб ишлайман. Буюртма овқатни топшириб, машинага ўтирганимда полициячилар менга мурожаат қилишди ва ҳужжатларимни сўрашди. "Сен қаерда яшайсан?" - деб сўрашди мендан. Яқинда рўйхатдан ўтганим сабаб яшаш манзилимни унутиб қўйдим. Шунда қўлларимни қайириб, милиция бўлимига олиб боришди. 

Аброр "рўйхатдан ўтган жойида яшамаётгани сабаб" милиция ходимлари томонидан жаримага тортилган. Лекин унинг сўзларига қараганда, у билан бирга полиция бўлимига олиб келинган муҳожирларнинг аксарияти барча ҳужжатлари бўлишига қарамай 5000 рубль (80 доллар) миқдорида жаримага тортилган.
Полиция "Сиз рўйхатдан ўтган жойингизга боришингиз керак", деди. Худди шу айблов билан яна 10-15 ўзбекистонлик бўлимга олиб келинди ва жаримага тортилди. 
Жабрланувчининг сўзларига кўра, у 24 соат давомида полиция бўлимида ушлаб турилган ва полиция томонидан тақдим этилган ҳужжатларга имзо қўйишга мажбур қилинган. 

Полиция ходимларидан бири билан суҳбатда ўзларининг ноқонуний ҳаракатларини "юқоридан келган буйруқ" билан изоҳлашга ҳаракат қилган.

- Биласизки, биз ўзбеклар қўрқамиз ва агар гапирадиган бўлсак, бизни уришлари мумкин. Мен бундай босим фақат ўзбекларга нисбатан қўлланилишининг гувоҳи бўлдим. Улар менинг камарим ва пойабзалимнинг ипларини ечиб олишди ва қолган саккизта ўзбек билан бирга совуқ, кичкина ва эскирган камерага қамашди. "Нега бизни қийнаяпсан?" деб сўрасам, милиционер "Бу сиёсат! Сизлардан яна кўпдан кўп одам келяпти - сизлар кўпчиликсизлар. Сизларни камайтириш бўйича юқоридан топшириқ келди", - деб жавоб берди, дейди Аброр.

Охир оқибат, полиция уларга ҳужжатларга имзо қўйдирган ва таржимонсиз ҳамда протокол нусхасисиз идорадан чиқариб юборган.

Аброрнинг айтишича, полиция шу тарзда асосан Ўрта Осиёдан келган мигрантлар ҳисобига бюджетни тўлдиришни режа қилган.

Мигрантлар, шу жумладан Аброр ҳам ҳибсга олинган 23-полиция бўлими вазиятга қуйидагича изоҳ берди. "Бизга ҳужжати йўқларни олиб келишади. Ҳужжатга эга бўлганларни полиция бу ерга олиб келишга ҳақли эмас", деди навбатчи бўлим раҳбари ва у Аброр иши ҳақида ҳеч нарса билмаслигини қўшимча қилди.

Санкт-Петербурглик адвокат Николай Новиковнинг сўзларига кўра, Аброрни ушлаган ва жавобгарликка тортган полиция ходимининг ҳаракатларида жиноят аломатлари мавжуд. "Биз милиция ва тергов қўмитасига шикоят тайёрладик. Бизнинг шикоятимиз милициянинг "ўз ваколатлари доирасидан чиқиб кетганлиги"га асосланган. Биз тергов очилишини ва милицияга қарши 285-286 моддалар бўйича жиноий иш очилишини талаб қилдик, аммо ҳозирча жавоб хати олмадик", деди адвокат.

Новикованинг сўзларига кўра, у 23-бўлим бошлиғи Сергей Колонистовдан яна бир ҳафта давомида жавоб кутади ва жавоб бўлмаган тақдирда шикоят юқори органларга жўнатилади.

"Левада маркази" нодавлат ташкилоти томонидан ўтказилган тадқиқотларга кўра, Россияда кейинги пайтда меҳнат мухожирларига қарши салбий кайфият кучаймоқда.

Ижтимоий тадқиқотлар маркази ўтказган сўнгги сўровлар шуни кўрсатдики, Россияга келаётган меҳнат мухожирларининг сони камайишини истовчилар 72 фоизни ташкил этмоқда. Икки йил олдин мухожирларга қарши чиққан руслар 58 фоиз эди.
"Левада маркази" мутахассисининг таъкидлашича, иқтисодий қийинчиликларни бошдан кечираётган Россия жамиятида миллатлараро ва миграцияга оид муаммолар тобора муҳим аҳамият касб этмоқда.
ca-news.org