Россияда Human Rights Watch халқаро инсон ҳуқуқлари ташкилотини “исталмаган ташкилот” деб эълон қилинди

Хабар берилишича, Россия Адлия вазирлиги халқаро ташкилотни тегишли рўйхатга киритган.

2022 йилда Россия “Украина уруши ҳақида ҳақиқатга тўғри келмайдиган маълумотлар жойлаштириш” айблови билан Human Rights Watch (HRW) сайтини блокланган эди. 2025 йилда ташкилот ҳисоботида Россия ҳукумати ўзгача фикрга эга бўлган фуқароларга нисбатан репрессияларни кучайтираётгани, фуқаролардан урушни қўллаб-қувватлашни талаб қилаётгани қайд этилган.

Россия ҳукумати томонидан “исталмаган ташкилот” деб эълон қилинган тузилмаларнинг мамлакат ҳудудуда фаолият юритиши тақиқланади ва улар билан ҳамкорлик қилганлик учун жиноий жавобгарлик белгиланган.

Human Rights Watch — дунёдаги энг йирик ҳуқуқни ҳимоя қилиш ташкилотларидан бири бўлиб, 1978 йилдан бери фаолият юритади ва 70 дан ортиқ мамлакатларда инсон ҳуқуқлари бузилишини мониторинг қилади.