Россияда автомобиль савдоси камайди

Ҳисоботда айтилишича, Россияда янги автомобиллар савдоси август ойида ўтган йилнинг шу даврига нисбатан 62,4 фоизга камайиб, 41,6 минг донани ташкил этди.

Мамлакатда январдан августгача жами 410,5 минг дона автомобиль сотилган, бу йиллик ҳисобда 60,7 фоизга камдир. Бозор 83,5 фоизга тушиб кетган май ойида пасайиш чўққисига чиқди. Август ойида рўйхатга киритилган деярли барча компаниялар савдоси пасайганини кўрсатди.

Август ойида сотилган автомобилларнинг деярли ярми Lada’га тўғри келди. АвтоВАЗ сотуви атиги етти фоизга тушиб, 18,1 минг донани ташкил қилди.

Россияда хорижий автомобилларнинг захиралари 3-6 ойга етади, улар тугаяпти, деди аввалроқ автомобиль эксперти Игор Моржаретто. Шу билан бирга, у Хитой бошқа ишлаб чиқарувчиларнинг ўрнини фаол равишда алмаштираётганини таъкидлади. Март ойидан бошлаб хорижий компанияларнинг кўплаб йиғиш заводлари ўз ишини тўхтатди, хорижий автомобиллар деярли етказиб берилмади.