Россия ракета базасидаги авариядан сўнг осмон бинафша рангга бўялди

Россиянинг Оренбург шаҳри яқинидаги ракета базасида содир бўлган кучли портлашдан осмонда бинафша ранг булут юзага келди.

Оренбург вилоятидаги стратегик ракета қўшинлари базаси ҳудудида кучли портлаш содир бўлгани ҳақида Россиянинг “Урал56” портали ва Қозоғистоннинг ArbatMedia нашри гувоҳларга таяниб хабар берди.

Defence Express ахборот-консалтинг компаниясининг ёзишича, портлашга РС-28 “Сармат” қитъалараро баллистик ракетасини учириш чоғида юз берган авария сабаб бўлиши мумкин.

Портлаш Россиянинг Қозоғистон чегарасига яқин бўлган Ясное шаҳрида содир бўлган. Гувоҳларнинг айтишича, улар кучли портлаш овозини эшитган, шундан кейин ҳудуд осмонида бинафша ранг тутун булути пайдо бўлган. Defence Express таҳлилчиларига кўра, бундай ранг фақат “амил” ва “гептил” каби ўта заҳарли ёқилғи жуфтлигидан фойдаланиладиган ракеталарга хос.

Ясноеда “Авангард” гипертовушли ракета мажмуалари жойлаштирилган. Бу ерда узоқ масофага мўлжалланган, жумладан ядро каллакли ер усти ракеталарини учириш имконини берувчи старт майдончаси мавжуд.