Рамазонда Масжидул ҳаромга берухсат кирганлар 1000 риёл жаримага тортилади

Саудия Арабистони Рамазон ойида Масжидул ҳаромга кириш тартибига риоя қилмаганлар жаримага тортилишини маълум қилди, дея хабар бермоқда “Анадолу”.

Ички ишлар вазирлиги тарқатган баёнотда айтишича, умра учун келган, бироқ Масжидул ҳаромга белгиланган тартибни бузган ҳолда кирганларга 10 минг риёл, рухсатсиз кирган зиёратчиларга эса 1000 риёл жарима тайинланади. Ушбу амалиёт Рамазондан кейин ҳам давом эттирилади.

Рамазон ойи давомида ҳар куни умра учун келган 50 минг, намоз ўқиш учун келган 100 минг кишининг Масжидул ҳаромга киришига рухсат берилади. Кириш учун эса коронавирусга қарши эмланган бўлиш ҳамда Tawakkalna ва Eatmarna иловалари орқали рухсат олиш зарур.

Рамазонда Масжидул ҳаром ва Масжидун Набавийда ҳам, Саудия Арабистонининг бошқа масжидларида ҳам профилактика чораларига риоя қилган ҳолда таровиҳ намозини ўқишга рухсат этилади.