Президент матбуот котиби Самарқандда брифинг ўтказди

Ўзбекистон Республикаси Президенти матбуот котиби Шерзод Асадов бугун Самарқанд шаҳрида ўз ишини бошлайдиган ЮНЕСКО Бош конференцияси 43-сессияси арафасида оммавий ахборот воситалари вакиллари учун брифинг ўтказди.

"Бугун Самарқанд шаҳрида ўз ишини бошлайдиган ЮНЕСКО Бош конференцияси 43-сессияси арафасида оммавий ахборот воситалари вакиллари учун брифинг ўтказдим.

Энг муҳим маълумотлар:

- Бу тарихий воқеа сўнгги 40 йил ичида илк бор Париждаги бош қароргоҳдан ташқарида ва биринчи марта Марказий Осиёда ўтказилмоқда, ЮНЕСКО ташкил этилганининг 80 йиллиги билан бир вақтда ўтмоқда;

- 43-сессия минтақа тарихидаги энг йирик халқаро форумлардан бири бўлади. Унда 190 та аъзо давлат ва халқаро ташкилотлардан 2 минг 800 дан ортиқ вакил, шу жумладан 70 га яқин юқори даражали шахслар иштирок этади;

- тантанали очилиш маросимида фахрий меҳмонлар сифатида ташриф билан мамлакатимизда бўлиб турган Сербия Республикаси Президенти Александр Вучич ва Словакия Республикаси Президенти Петер Пеллегрини ҳам қатнашади;

- Самарқанд сессияси доирасида 150 дан ортиқ турли тадбирлар, шу жумладан Ўзбекистон ташаббуси билан 20 дан зиёд қўшимча тадбирлар ташкил этилади;

- тантанали очилиш маросимида Президентимиз Шавкат Мирзиёев иштирок этиб, нутқ сўзлайди. Давлатимиз раҳбарининг нутқида бир қатор муҳим ташаббуслар илгари сурилиши кутилмоқда;

- тадбир доирасида Президентимиз Словакия Президенти Петер Пеллегрини ва ЮНЕСКО Бош директори Одри Азуле билан икки томонлама учрашувлар ўтказади;

- ЮНЕСКО Бош конференциясининг 43-сессияси дунё ва мамлакатимизнинг етакчи оммавий ахборот воситалари, жами 500 дан зиёд журналист томонидан ёритилади. Самарқандда уларнинг самарали фаолияти учун барча шароитлар яратилган" - дейилади Шерзод Асадовнинг ижтимоий тармоқлардаги постида.