Намангандан шикоят: тез тиббий ёрдам ходимларига ажратилган рағбатлантириш пуллари тўлиқ берилмаяпти

Хабарингиз бор, “Коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимларини қўшимча моддий рағбатлантириш тўғрисида” Ҳукумат қарори (458-сон, 30.07.2020 й.) қабул қилинган эди.

Қарорга мувофиқ, коронавирус инфекцияси тарқалишига қарши кураш, аҳолининг санитария-эпидемиологик осойишталиги ва саломатлигини сақлашга жалб қилинган тез тиббий ёрдам ходимлари қуйидаги миқдорда бир марталик моддий рағбатлантирилади:

🔸 врачларга – 5 млн сўм;
🔸 ўрта тиббиёт ходимлари (фельдшерлар ва санитарлар)га 4 млн сўм;
🔸 ҳайдовчиларга – 3 млн сўм.

Аммо "Aniq.uz"га йўлланган мурожаатга кўра, Наманган вилояти, Тўрақўрғон туманида тез тиббий ёрдам ходимларига, хусусан, ҳамшираларга белгиланган бир марталик рағбатлантириш пуллари тўлиқ берилмаган. Мурожаат муаллифи ҳамшираларга 2 млн атрофида пул берилганини айтмоқда.

P/S. Бу борада аниқ хулоса чиқариш фикридан йироқмиз. Боиси, ҳақиқат Яратганга ва тегишли одамларгагина маълум. Умид қиламиз, тегишли ташкилотлар ушбу ҳолат бўйича муносабат билдиришади ва керакли чораларни кўришади.