Озарбайжон армиясининг муҳандислик-сапёрлик бўлинмалари туркиялик сапёрлар билан биргаликда Арманистон босқинидан озод қилинган ҳудудларни мина ва портламаган ўқ-дорилардан тозалаш ишларини давом эттирмоқда. Бу ҳақда Озарбайжон Мудофаа вазирлиги маълум қилди.
Ҳудудда ҳаракат хавфсизлигини таъминлаш мақсадида йўллар миналардан тозаланмоқда. Хусусан, 22 ноябрдан 2 декабргача бўлган даврда Тертер – Геранбой туманлари йўналишида янги йўллар қуриш жараёнида Арманистонда ишлаб чиқарилган 537 та пиёдаларга қарши ва 101 та танкка қарши миналар топилиб, зарарсизлантирилди.
Бугунги кунга қадар Қорабоғдаги озод қилинган ҳудудларда муҳандис-сапёрлик бўлинмалари томонидан 13 минг 177 гектар майдон миналардан тозаланди, 616 километр йўл ётқизилди, 16 минг 860 мина ва портламаган ўқ-дорилар топилиб, йўқ қилинди.
Аҳоли пунктлари ва экин майдонларини миналар ва портламаган ўқ-дорилардан тозалашда Туркияда ишлаб чиқарилган МEМАТТ ускунасидан фойдаланилмоқда.