Бугун 29 март, 2024 йил, жума

O'ZB

Маймунчечакни юқтирган беморларнинг ўн фоизи ҳаётдан кўз юммоқда

Маймунчечакни юқтирган беморларнинг ўн фоизи ҳаётдан кўз юммоқда

Дунёда маймунчечагини юқтирган беморлар сони кундан кун ортмоқда.

ЖССТнинг Жаҳон соғлиқни сақлаш ассамблеяси навбатдаги сессиясига тақдим этган кечаги маълумотларига кўра, тасдиқланган жами касаллик ҳолатлари 131 тага етди. Шунингдек, яна 106 киши вирусга чалинганликда гумонланиб, карантинга олинган. Ҳозирча мазкур инфекция рўйхатга олинган давлатлар сони 17 тани ташкил этяпти. Энг кўп ҳолатлар Испанияда — 40, Португалияда — 37 ва Буюк Британияда — 20 нафар беморда қайд этилган. Энди улар қаторига яна иккита мамлакат қўшилиши мумкин. Айни пайтда Судан ва Аргентинада шубҳа остига олинган беморларда текширувлар ўтказиляпти.

Жаҳон соғлиқни сақлаш ташкилотининг Ўта хавотирли инфекцияларга глобал тайёргарлик департаменти директори Силви Брианднинг таъкидлашича, аниқланган ҳолатлар “айсбергнинг учи”ми ёки касалликнинг тарқалиш чўққиси аллақачон ўтиб кетганми, буни вақт кўрсатади".

Шу билан бирга, ташкилот экспертлари маймунчечаги эпидемияси аҳолини шошилинч оммавий эмлашни талаб қилмайди, деган хулосада.

ЖССТнинг яна бир расмий вакили Ричард Пибоди Африка мамлакатлари, хусусан, Конго Демократик Республикаси, Конго Республикаси, Камерун, Марказий Африка Республикаси, Нигерия, Либерия, Кот-д’Ивуар, Сьерра-Леоне, Габон ва Жанубий Судан инфекция ўчоғи бўлиши мумкинлигидан огоҳлантирмоқда. Шу боис, мазкур давлатларга борган сайёҳлар касаллик ташувчи ҳайвонлардан узоқ бўлиши, шахсий гигиена қоидаларига қатъий амал қилиши лозим.

Мутахассисларнинг айтишича, хасталик иситма, умумий интоксикация ва танада тошмалар пайдо бўлиши билан намоён бўляпти. Беморларнинг 10 фоизи инфекция асоратлари туфайли ҳаётдан кўз юмяпти. Уларнинг аксарияти чечакка қарши эмланмаган кишилардир.

Эслатиб ўтамиз, айни пайтда маймун чечагини даволаш учун махсус муолажа усуллари ҳамда унинг олдини олишга қаратилган алоҳида вакциналар мавжуд эмас, деб хабар беради Соғлиқни сақлаш вазирлиги матбуот хизмати.

Киритилди: 15:14 25.05.2022. Ўқилди: 3374 марта. Фикрлар сони: 7 та.
telegram channel

Бўлимга тегишли қизиқарли хабарлар

Энг кўп ўқилган янгиликлар

бир кунда ҳафтада бир ойда

Фикр билдириш учун қайдномадан ўтишингиз сўралади ва телефон ракамни тасдиклаш керак булади!