"Ливерпуль" раҳбарияти Клоппга мурожаат қилади, агар...

"Ливерпуль" хўжайинлари Арне Слот истеъфога чиқарилган тақдирда бош мураббий лавозимини эгаллашни сўраб Юрген Клоппга мурожаат қилишлари мумкин, деб хабар бермоқда Британиянинг The Sun нашри.

Манбага кўра, германиялик мутахассисга жорий мавсум якунига қадар мураббий сифатида ишлаш таклиф қилиниши мумкин. Клопп "Ливерпуль"да 2015 йилнинг октябридан 2024 йилнинг июнигача ишлаган. Слот "қизиллар"ни Юрген кетган заҳоти қабул қилиб олди.

Арне Слот қўл остида "қизиллар" 2024/2025 йилги мавсум якунларига кўра Англия Премьер-лигасида ғолиб чиқди. Жорий мавсумда "Ливерпуль" барча мусобақаларни қўшиб ҳисоблаганда тўққизта ўйинда мағлуб бўлди ва бир кун олдин Чемпионлар Лигасида ПСВга (1:4) ютқазди.