Каттақўрғонлик солиқчи ўлими: марҳумнинг яқинлари унга куч ишлатилганлигини, шифокор эса тескарисини айтмоқда

Самарқанд вилоятининг Каттақўрғон туманида 10 июнга ўтар кечаси ҳудудий Давлат солиқ инспекцияси бошлиғи ўринбосари, 41 ёшли Азизбек Аҳмедов йўл ҳаракати хавфсизлиги хизмати ходимлари томонидан қўлга олиниш пайтида вафот этгани ҳақида хабар берилган эди (видео). Бу ҳақда "gazeta.uz" ёзмоқда.

Ички ишлар вазирлигининг 11 июндаги баёнотида Аҳмедов ЙПХ ходимлари томонидан ушланиб, «ўта маст ҳолатда бўлгани гумон қилиниб, тиббий кўрикдан ўтиш учун таклиф қилинганида, фуқаро ички ишлар органлари ходимларининг қонуний талабларини бажармасдан фаол қаршилик кўрсата бошлагани, шу вақт оралиғида тиббий кўрикка олиб бориш учун транспорт воситасига ўтқазилган фуқаронинг соғлиғи ёмонлашиб, воқеа жойига тез тиббий ёрдам хизмати чақиртирилгани, бироқ кўрсатилган муолажаларга қарамай, фуқаро А.А. вафот этгани» таъкидланади.

Ҳолат юзасидан Каттақўрғон туман прокуратураси томонидан Жиноят кодексининг 206-моддаси (ҳокимият ёки мансаб ваколати доирасидан четга чиқиш) аломатлари билан жиноят иши қўзғатилган. Тергов устидан Бош прокуратура томонидан назорат ўрнатилган.

Ўзбекистон Сенатининг Мудофаа ва хавфсизлик масалалари қўмитаси мазкур ҳолат бўйича ўрганиш натижалари маълумотларини кенг оммага эълон қилишини билдирган. «Ҳолат юзасидан якуний хулоса, тергов жараёнлари ўз ниҳоясига етгандан сўнг маълум бўлади», — дейилади Сенат қўмитаси раиси Қутбиддин Бурҳоновнинг баёнотида.

Kun.uz ва Daryo.uz нашрларининг суриштируви

Kun.uz ва Daryo.uz нашрлари Каттақўрғон туманида бўлиб, воқеа гувоҳлари, марҳумнинг касбдошлари ва яқинлари билан учрашди.

Каттақўрғон туман давлат солиқ инспекцияси бошлиғи Акбарали Қулмирзаев. Фото: Kun.uz

Маълум қилинишича, Каттақўрғон туман давлат солиқ инспекцияси бошлиғи Акбарали Қулмирзаев ўз ўринбосари ишда намунали ходим бўлгани, ҳеч қачон соғлиғидан шикоят қилмагани, ҳаттоки коронавирус билан касалланмаганлигини айтиб ўтган. Қулмирзаев Kun.uz мухбири билан суҳбатда воқеа иш вақтида содир бўлмагани ва бошлиқ воқеа устида бўлмагани сабабли, бошқа тафсилотларни маълум қила олмаслиги, ҳолат бўйича тергов олиб борилаётганини билдирган.

Марҳумнинг амакиси Исомиддин Жамолов жияни 20 йилдан буён солиқ идораларида ишлаб келгани, у шу вақтгача бирорта таблетка ичмагани ва ҳеч қачон соғлиғидан шикоят қилмаган бақувват йигит бўлганини таъкидлаган.

Азизбек Аҳмедовни қўлга олишда иштирок этган ЙПХ ходимлари. Фото: Kun.uz

Kun.uz воқеа гувоҳларининг сўзларини келтиришча, мазкур воқеа 9 июндан 10 июнга ўтар кечаси соат тахминан 12:20 — 12:50ларда Каттақўрғон туман марказига ёндош Кадан шаҳарчасидаги 4R-243 — Пайшанба-Каттақўрғон йўлининг 7-километрида содир бўлган. Маълум қилинишича, ЙПХ ходимлари — туман ИИБ йўл ҳаракати хавфсизлиги бўлинмаси бошлиғи, лейтенант Меҳриддин Қўчқоров, катта сержант Шуҳрат Холиқулов, кичик сержант Нодир Исмоилов, кичик сержант Шаҳбоз Раҳимбердиев Азизбек Аҳмедов бошқарувида бўлган 30 B 572 RA рақамли Cobalt автомашинасини 30 X 577 SA рақамли Spark автомобилида қисиб тўхтатишади. Чунки Cobalt светофорнинг қизил чироғида чорраҳани кесиб ўтган эди.

Воқеанинг исми сир қолишини сўраган гувоҳларидан бири «Дарё» мухбири билан суҳбатда ЙПХ ходимларининг Азизбек Аҳмедовни Spark’га ўтказишга кучи етмагани, жисмонан бақувват бўлган марҳум солиқчи уч нафар ЙПХ ходимини коллеж томонга судраб киргазганини айтади. ИИВ баёнотида таъкидланишича, бу вазиятда «ўта маст» деб гумон қилинган Аҳмедовни ЙПХ ходимлари «тиббий кўрикдан ўтиш учун таклиф қилаётган» бўлган, бироқ фуқаро йўл назоратчиларининг Spark`ига ўтиришга фаол қаршилик кўрсатган.

«Cobalt ва Spark ёнма-ён келди. Spark`дан уч нафар ЙПХ ходими тушиб, Cobalt эгасини машинадан тушириб олди. Улар ҳайдовчини Spark`га тиқаман деганда, у ичкарига кирмай, уларни четроққа суриб борди. Кейин амаллаб Spark`ка тиқишди. Мен бўлди энди, олиб кетади деб, бепарво бўлдим. Озгина вақт ўтгач қарасам, Cobalt`нинг эгаси ерда ётган экан», — дейди ҳодиса гувоҳи. Унинг қўшимча қилишича, «марҳум маст бўлгандир, аммо ўзини йўқотиб қўйгани йўқ; қўйворинглар, қанча „оклад“ бўлса ҳам жаримани тўлайман, дея бақирарди».

Шарофиддин Эргашев. Фото: Daryo.uz

Аниқланишича, мазкур ҳолат Кадан шаҳарчасидаги 1-сонли касб-ҳунар мактаби (собиқ коллеж) рўпарасида содир бўлган. Коллеж қоровули Шарофиддин Эргашев «Дарё» мухбири билан суҳбатда ЙПХ ходимлари марҳум Азизбек Аҳмедовни Spark`да тахминан 10−15 минут ушлаб турганини билдирди. Унинг қайд этишича, машина ичида нима бўлгани унга эшитилмаган, бироқ фуқаро ундан ҳушсиз ҳолда олиб чиқилган (бу ЙПХ ходимларининг бодикамерасидан олинган видеоёзувларда ҳам акс этган). Воқеа жойига чақирилган тез ёрдам бригадаси эса фуқаронинг жони узилиб бўлганини билдириб, мурдани олиб кетган.

«Дарё» туман тез тиббий ёрдам бўлими навбатчи шифокори Аббос Иброҳимовнинг сўзларини келтиришича, Кадандаги коллеж олдидан чақирув соат 00:39 да келиб тушган. «Борганимизда бемор ерда ётган эди. Беморнинг қон босимини, нафас олишини текширдик. Кўз қорачиғини кўрганимда у кенгайган экан. Артериал қон босими нолда эди, пулс йўқ экан. Нафас олмаётганди. Шунда беморнинг ўлганига амин бўлиб, ички ишларга айтдик, улар ёрдам кўрсатинглар деди. Биз ёрдам берган бўлсак-да, бемор ўлиб бўлган эди», — деди у.

Иброҳимовнинг қўшимча қилишича, у беморнинг кимлиги ва қаердан келганини сўраганида, унга марҳумнинг 5−7 дақиқа аввал шу ерга келганини айтишган. «Бошқа гапни билмайман. Мастлик ҳолатига келсак, маст бўлган бўлиши мумкин, аммо мен ўша вақтда спиртли ичимлик ҳидини сезмадим», — дея таъкидлади тез ёрдам шифокори.

Соат 1:09 да Азизбек Аҳмедовнинг мурдаси туман тез тиббий ёрдам бўлимига олиб келинган. Мурдани кўрикдан ўтказган врач-терапевт Абдужалол Абдураҳимовнинг сўзларига кўра, «кўрик пайтида тана нисбатан совиган, ўлим белгилари бор, ҳаётий органларнинг бирортаси ишламаётган эди».

«Кўрик давомида ўнг кўз атрофида кичкинагина шилинган жойи („царапина“) бор эди. Биз беморнинг кийимларини ечиб тўлиқ текшириб кўрганимизда, танасидан ҳеч қандай жароҳатларни кўрмадик», — дея таъкидлади у. Марҳумнинг яқинлари Kun.uz мухбири билан суҳбатда Аҳмедовни тинчлантириш учун унга нисбатан бўғиш самбо қўлкураши усули қўлланилганини, унинг бошини пастга босишганини, нафас етишмовчилигидан ўлим содир бўлганини тахмин қилишади.

Абдужалол Абдураҳимов. Фото: Daryo.uz

«Марҳумнинг қариндошлари унинг жасадида куч ишлатилганлик излари борлигини таъкидлашди. Чунончи, маййитни ювган қариндошлар унинг икки қўлида бармоқ излари, бўйнида ва юзида шилинган жароҳатлар борлигини айтишди», — дейилади Kun.uz суриштирувида.

ИИВнинг муносабатида билдиришича, Азизбек Аҳмедов ходимларнинг тўхташ ишорасига бўйсунмасдан, юқори тезликда ҳаракатланиб яширинмоқчи бўлган. Расмий изоҳда 4R-243 йўлининг 7-километрига етганида ҳайдовчи Cobalt`ни йўлнинг қатнов қисмининг ўртасида тўхтатиб, машинани ташлаб, пиёда қочишга урингани айтилади.

Kun.uz қўлга киритган, ўша кунги воқеага оид ИИБ тезкор хабарномасига кўра, Азизбек Аҳмедов тўхташ ишораси берилганидан сўнг тўхтагани, у ЙПХ ходимларидан ўзига азоб бермасликни бақириб сўраганидан сўнг ҳам ЙПХ ходимлари унга нисбатан куч ишлатишда давом этиб, юзини пастга қаратган ҳолда машинанинг орқа ўриндиғига босиб туришгани, шундан сўнг қисқа муддатда ўлим юз бергани қайд этилган.

Воқеа юзасидан тезкор хабарнома. Фото: Kun.uz

Kun.uz нинг келтиришича, воқеа юз берган жой билан туман тиббиёт бирлашмаси оралиғидаги масофа тахминан 750 метр бўлган. Шунга қарамасдан, ЙПХ ходимлари Азизбек Аҳмедовни туман тиббиёт бирлашмасига ўзлари олиб бормасдан, тез тиббий ёрдам келишини кутган.

Воқеа жойидан ТТБгача бўлган йўл схемаси. Фото: Kun.uz

Марҳум Азизбек Аҳмедовнинг амакиси Исомиддин Жамолов «Дарё» мухбири билан суҳбатда таъкидлашича, ЙПХ ходимлари А.А. ўлиб бўлгач тез ёрдамга қўнғироқ қилган, машинадан тушириб ташлаган. «Агар мард бўлганида машинага солганидан сўнг, тезроқ шифохонага олиб борарди. Ичган бўлса жазосини берсин, жаримасини қўлласин эди!», — дея қўшимча қилади марҳумнинг амакиси.

«Агар жиянимнинг ўлими билан боғлиқ ҳолат адолатли кўрилмаса, мен жамиятга ишонмайман. Вилоят прокурори ишни шахсан ўзи назоратга олганини айтди. Мен прокурорнинг лафзига ишондим… Агар жиянимнинг ўлими билан боғлиқ ҳолатда адолат қарор топмаса, мен бу жамиятдан норозиман», — дейди у.

Kun.uz`нинг қайд этишича, воқеа содир бўлган куни Кадан шаҳарчасида 4 нафар ЙПХ ходимлари сигнал чироқлари бор хизмат машинасида эмас, шахсий машинада патруллик қилаётган бўлган. Самарқанд вилоят ИИБ ахборот хизмати бошлиғи Жаҳонгир Саъдуллаевнинг тушунтиришича, 2021 йилнинг ўтган даври ичида Каттақўрғон туманида жиноятчилик даражаси ошган, 14 та автоҳалокат содир бўлган ва уларнинг 2 таси ўлим билан тугаган. Шу сабабли туманда тунги патруллик кучайтирилган. Ходимларнинг шахсий автомашиналаридан ҳам хизматда фойдаланишга рухсат берилган.

Kun.uz`га маълум бўлишича, ўша куни 4 нафар ходимдан 3 кишининг бодикамераси ишламаган. Кимникидир ечиб қўйилган бўлган, яна иккитасининг батареяси ўтириб қолган.

Толбулоқликлардан бири Kun.uz мухбири билан суҳбатда ушбу машъум ҳодисадан 6 кун муқаддам, 4 июнь куни икки нафар ЙПХ ходими — Шаҳбоз Раҳимбердиев ва Шуҳрат Холиқуловларнинг жисмоний босимига дучор бўлганини айтди.

Қайд этилишича, ўша куни Каданда рўй берган воқеани ўз кўзи билан кўрган гувоҳлардан бири марҳумнинг яқинларига воқеа қандай бўлганини ҳикоя қилиб берган.

Унинг сўзларидан, ЙПХ ходимлари ва солиқ идораси ходимлари ҳеч қандай ҳақоратли сўзлар ишлатишмаган. Гувоҳ ЙПХ ходимлари Аҳмедовнинг машинасини жарима майдончасига жойлаштириб, ўзини «Спарк» машинасига мажбурлаб миндирмоқчи бўлишгани, оқибатда ҳайдовчи ўлиб қолганини айтади. Гувоҳнинг сўзларидан хулоса қилинса, «Cobalt» автомашинаси қисиб тўхтатилганидан бошлаб, «тез ёрдам» машинаси келиб, солиқчининг ўлимини қайд этгунгача 40−45 дақиқа вақт ўтган.

Kun.uz нинг маълум қилишича, Азизбекнинг отаси 48 ёшида автоҳалокат туфайли оламдан ўтган экан. Онаси 10 та етим фарзандни ўзи катта қилиб, оёққа турғизган. Азизбекнинг бир синглиси ҳам 2011 йилда эрта оламдан ўтган. Синглининг икки нафар фарзанди ҳам унинг қарамоғида бўлган. Марҳумнинг вояга етмаган 2 нафар фарзанди — ўғли ва қизи ҳам бор.

Фото: Daryo.uz

«Менинг болам тилла бола эди… Нима учун менинг шундай боламни азоблаб ўлдиришди? Нега азоб берди? Гуноҳи бўлса айтсин эди… Нима учун азоб берган? ЙПХ ходимлари нега боламга азоб бериб ўлдиради? Қонуний иш кўрмаса, рози эмасман», — дея марҳум Азизбек Аҳмедовнинг онаси Муҳаббат опанинг сўзларини келтиради «Дарё».

ИИВ 13 июнь куни ижтимоий тармоқларда Каттақўрғон туманида ЙПХ инспекторларининг фаолияти жараёнида фуқаро вафот этганлиги борасида ёлғон ёки нохолис ахборот тарқалишини олдини олиш мақсадида муносабат билдирди. Унга кўра, ИИВ ушбу воқеа бўйича ёлғон, нохолис ахборот тарқатганлар жавобгарликка тортилиши мумкинлиги ҳақида огоҳлантирди.