Бугун 29 март, 2024 йил, жума

O'ZB

Ихтирочи Apple, Samsung ва Huawei компанияларини судга берди

Ихтирочи  Apple, Samsung ва Huawei компанияларини судга берди

Машҳур компанияларни ҳам судга бериш мумкинми? Бу қандай содир бўлган, дейсизми? Бу бир уддабуроннинг найранги, деб ўйласангиз адашасиз. Аслида воқеа қуйидагича юз берган.

🎓Россиялик муҳандис Александр Земсков Apple, Samsung ва Huawei компанияларининг Россияда жойлашган филиаллари устидан судга мурожаат қилди.

💵Гап шундаки, Земсков қурилма жойлашув жойини кўрсатувчи технологияни патентлаган ва юқоридаги компаниялар унинг технологиясидан фойдаланиб, ўз смартфонларини Россия ҳудудига олиб кириб, муаллифлик ҳуқуқини бузган, деган важ билан судга даъво аризаси киритган. Ихтирочи улардан патентга бўлган мутлақ ҳуқуқни бузганлик учун товон пули ундиришни талаб қилмоқда.

🔖Земсков "Объектнинг ҳудудда жойлашган жойини аниқлаш усули ва тизими" патенти муаллифи саналиб, патент 2008 йилдан бери Россия давлат патент идораси базасида мавжуд. Ихтиро энг яқин уяли алоқа таянч станциясидан электромагнит нурланиши ҳақидаги маълумотлар орқали гаджетнинг жойлашув ҳудудини аниқлашга имкон беради.

👉Патентни рўйхатдан ўтказишга бўлган эҳтиёж қаердан пайдо бўлди, дейишингиз мумкин. Земсков «Всевидящеэ око» МЧЖ Бош директори сифатида фаолият юритган. Шунда транспорт компаниялари раҳбарлари ўз транспорт воситаларининг қаердалигини билишни ва уларни назорат қилиш ҳақида мурожаат қилишади. Ўша пайтда, бу фақат ГПС технологияси орқали амалга оширилиши мумкин эди, лекин шунда ҳам транспортни аниқланиш тезлиги жуда паст ва гаражлар ёки туннелларда машиналарни кузатиш иложи йўқ эди. Бир неча йиллик изланиш натижасида чекланган имкониятли ГПСдан батамом ўзга янги алгоритм пайдо бўлади. Земсков уни патентлайди ва географик хизматлар кўрсатадиган компания очишга қарор қилади. Бежизга иш билганга минг танга, деб айтишмаган экан.

Нега низо ҳозир пайдо бўлди?

👉Патент вакили изоҳ берганидек, барча замонавий смартфонлар жойлашувини аниқлашнинг иккала усули - ҳам ГПС, ҳам таянч станциядан сигнал қабул қилиш қўлланилади. "Ихтирочиларнинг умумий бахтсизлиги - бу ихтироларини чет элда патентлаш учун моддий имкониятларнинг етишмаслиги, бундан эса хорижий компаниялар унумли фойдаланишади. Амалдаги қонунчиликка мувофиқ, маълум бир мамлакатда ихтирога ариза бериш орқали муаллиф бошқа мамлакатларда ариза бериш учун чекланган муддатга эга ва агар у ўтказиб юборилса, ҳеч ким ҳатто ариза топширган ихтирочи ҳам патент ололмайди. Шунинг учун бутун дунёда ушбу ихтиродан ҳар ким фойдаланиши мумкин, аммо Россияда фойдаланилганда патент эгасидан лицензия олиши керак", - дейди патент вакили.

Муҳандис товон пули сифатида қанча пул талаб қилмоқда

👉Масаланинг энг қизиқ жойи шу бўлса керак. Земсков Apple, Samsung ва Huawei компанияларидан унга ҳар бири смартфондан аниқланган қоидабузарлик учун 10 минг рублдан товон пули талаб қилмоқда. Бу дегани агар Apple Россия бозорига 100 минг смартфон олиб кирган бўлса, уларнинг ҳар биридан 10 минг рублдан товон пули тўлаши керак дегани. Кўриб турганигиздек, ихтирони патентлаш орқали ҳеч қийинчиликсиз бойиб кетиш мумкин. Албатта, бунинг учун интеллектуал салоҳиятни ишга солиш керак бўлади.

Киритилди: 16:33 12.04.2021. Ўқилди: 3133 марта. Фикрлар сони: 0 та.
telegram channel

Бўлимга тегишли қизиқарли хабарлар

Энг кўп ўқилган янгиликлар

бир кунда ҳафтада бир ойда

Фикр билдириш учун қайдномадан ўтишингиз сўралади ва телефон ракамни тасдиклаш керак булади!