Флорентино Перес Хаби Алонсога маслаҳат берди: "Винисиуснинг ғазабини қўзғама"

"Реал" президенти Флорентино Перес жамоа бош мураббийи Хаби Алонсо билан суҳбатлашди. Журналист Ману Каррено Cadena SER эфирида Перес Алонсога кўрсатма бергани ҳақида гапирди. Клуб раҳбари мураббийни юлдуз ҳужумчи Винисиус Жуниорнинг ғазабини қўзғатмасдан ишлашга чақирди.

"Агар сенинг "Реал"ингда Винисиус бўлса, унинг жаҳли чиқишига йўл қўйиб бўлмайди. Президент Перес буни Алонсога тушунтирди. Футболчилар - клубнинг активлари, мураббий эса - йўқ," - деди Каррено эфирда.

Хабарингиз бор, бир ой муқаддам Винисиус "Барселона"га қарши ўйинда захирага олинганига ғазаб билан муносабат билдирган эди.

Аввалроқ матбуотда Винисиус Алонсо билан иш муносабатларидаги муаммолар туфайли шартномани узайтиришни истамаётгани ҳақида ёзишганди. Бразилиялик ҳужумчининг фикрича, мураббий уни қадрламайди. Винисиуснинг меҳнат шартномаси 2026/2027 йилги мавсум якунига қадар мўлжалланган.