Ўзбекистон халқ артисти Эркин Комилов «Дарё» интернет-нашри учун эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Эркин Комилов суҳбат давомида «Шайтанат» сериалини 20 йил давомида ким «запрет» қилганини билишини, аммо унинг кимлигини айта олмаслигини маълум қилди.

Аллоҳ шу кунларни тўғри қилган экан, мана сериал барибир берилди. Кимдир қилган бу «запрет»ни, лекин ким қилганини Ёдгор билади, мен ҳам биламан. Айтиб бўлмайди. Барибир эфирга кетди-ку. Шундай нарсалар бўлганки, масалан Мирзо Улуғбекни ўйнаганимда кимлардир келиб кўкларга кўтарди. Уёққа нотўғри етиб борган. Энди бунга нима дейсиз? Биз кимга ёмонлик қилибмиз? Ёмонлик етиб боргандан кейин келиб кўрмайдими, ўз кўзи билан кўриши керак-ку, ахир бир вақт топиб бўлса-да! Келиб кўрса, ё тўғри экан, ё нотўғри экан дейди.

Тўғри, ҳаммага ҳам ёқавермаймиз. Ҳаммага ёқаман дейиш ҳам куфрликка киради. Йўқ, биз ҳам бир бандамиз. Кимгадир ош ёқади, кимгадир шавла. Худди шунақа нарса «Шайтанат»да ҳам бўлган. Тўхтатиб қўя қолган.

Ёки Тоҳир Маликка бир хусумати бордир у инсонни, ёки Ёдгорга хусумати бордир, ёки фильмни ўзи ёқмагандир. Нега бундай фильмларни тарғиб қилишимиз керак дегандир. Тўғри, «Шайтанат»дагилар ҳаммаси шайтон йўлига кирганлар. Ҳаммаси одам ўлдирган, ҳаммаси ҳам оппоқ эмас: Асадбек ҳам, Ҳосилбой ҳам, Чувринди ҳам, Ҳайдар ҳам. Битта Жалил бу ерда пок. Лекин барибир ақл йўлига киришди-ку, хатосини тан олди-ку. Шунақа инсонларга муҳтож экан, Асадбек каби йигитларга ҳам муҳтожлар бор экан-ку, жамиятда.

Кимгадир яхшилик қилган, кимгадир ёмонлик қилган. Лекин жамиятга эмас. Бирортаси жамиятга, давлат сиёсатига путур етказмаган. Ўз йўлида ҳаддидан ошганларни жазосини берган. Лекин сиёсатга ҳам аралашмаган, яхши ҳам демаган, ёмон ҳам демаган. Виждон ҳамма нарсадан улуғ турган.

Демоқчиманки, нимадан қўрқади? Давлатлар нимадан ҳайиқиб туради? Албатта, қуролдан. Давлатдан нега ҳайиқамиз биз? Чунки қонун устувор. Энди қонунни чиқарганлар нимадан қўрқиши керак? Худодан қўрқиши керак. Худодан қўрқмаса, у қонун бир тийин. Ўзлари қонунни чиқариб қўйиб, ўзлари бузиши мумкин. Шунинг учун улар Худодан қўрқиши керак.

Бу дунё ҳаммамиздан қолаверади, инсониятни кўтариб олиб кетаверади. Бу дунёнинг яралганига 4,5 млрд йил бўлган бўлса, ҳали бирорта одам уёқдан буёққа келган эмас. Одамлардан фақат яхшилик қолади.

Эркин Комилов, Ўзбекистон халқ артисти

Маълумот учун, Ўзбекистон халқ артисти Ёдгор Саъдиев «Шайтанат» сериалини «запрет» қилган одамларнинг ўзи, нега сериални «запрет» қилишганини билмаслигини айтганди. «Шайтанат» сериалининг ҳали эфирга узатилмаган 21-қисми ҳам мавжуд бўлиб, ушбу қисм Алишер Навоий номли кино саройида премьера қилиниши кутилмоқда.