Даҳшат! Тошкентда журналист аёл шифокор қабулига онлайн ёзилди. Аммо у шифокор ўлган экан (ВИДЕО)

Тошкентда "Менинг юртим" журналисти жуда ғалати воқеага дуч келди.

"Марказий студия" дастурида маълум қилинишича, журналист reg.ssv.uz сайти орқали онлайн рўйхатдан ўтиб, Республика ихтисослаштирилган Эндокринология илмий-амалий текширув маркази шифокори қабулига ёзилган. Унга кўра, журналист соат 10:00 да шифокор қабулига кириши керак. Аммо...

Журналист шифохонага келганидаёқ дастлабки тушунмовчиликка дуч келади. Яъни унга навбатда туриб рўйхатдан ўтиши кераклигини айтишади. Ваҳоланки, у соат 10:00 да қабулга ёзилган, бунга эса 5 дақиқача вақт қолган. Хайриятки, журналистнинг операторлар билан бирга келгани ва ҳолат съёмка қилинаётганини кўрган масъуллар унинг муаммосини ҳал қилишади. Лекин...

Журналист қўлидаги рўйхатдан ўтганлиги ҳақидаги талон билан (reg.ssv.uz сайти рўйхатдан ўтганлиги ҳақида талон ҳам берган) ўзи учрашиши керак бўлган шифокор олдига боради. Аммо унга у шифокор вафот этганини айтишади. Яъни журналист ўлган шифокорнинг қабулига ёзилган.

Ҳамма шармандалик ана шундан кейин маълум бўлади. Яъни reg.ssv.uz сайти орқали онлайн рўйхатдан ўтишдан ҳеч бир шифокорнинг хабари йўқ. Ҳеч ким бу ҳақда билмайди. Чунки бу касалхона тизимига уланмаган, шунчаки ҳисобот учун хўжакўрсинга қилинган.

Энг қизиғи, Тошкент шаҳар соғлиқни сақлаш бошқармаси раҳбдари ўринбосари Муаттар Абдуллаева журналистнинг reg.ssv.uz сайти орқали онлайн рўйхатдан ўтиш тизими ишлаяптими, деган саволига ҳеч иккиланмай ҳа, дея жавоб қайтарди. Ваҳоланки...

Таъкидлаш керакки, бунгача ким қанча одам айни журналистнинг аҳволига тушгандир. Аммо кўпчилик индамай яна борига кўниб кетаверган. Ташқаридан қараганда сайт бинойидек ишлаяпти. Аммо асл вазиятни юқоридаги видеода кўрдингиз.

Бу ҳолатга масъуллардан изоҳ кутиб қоламиз.