Австралия "тўсиғи"дан ўтишимизга ким сабабчи бўлади?

Эртага Ўзбекистон терма жамоаси Осиё Кубоги нимчорак финали доирасида Австралия билан ўйнайди.
Ғолиб чорак финалга, мағлуб уйига қайтади. Қаршимиздаги рақиб амалдаги Осиё Кубоги соҳиби эканини барча тушуниб турибди. Таркибида Англия, Голландия, Германия каби мамлакатлар клубида ўйнаётган футболчилар бор бўлган соккерузлар ни мағлуб этиш қийин, лекин буни уддаласа бўлади. Хўш, мана шундай кучли рақибни мағлуб этишга ким ёрдам беради?

Элдор Шомуродов
БААдаги Осиё Кубогида ўзини ёрқин томонлама намойиш этаётган Ростов ҳужумчиси гуруҳдаги учала баҳсда гол уришга эришди. Айни пайтда бутун бошли Осиё Кубогида фақат қатарлик Алмоез Али Шомуродовдан кўпроқ гол урган. Демак Элдордан Австралияга қарши ўйинда ҳам гол кутсак бўлади. Ҳужумчимизда баланд ва жисмонан бақувват бўлган австралиялик ҳимоячилардан чаққонлик эвазига қочиб кетиш имконияти албатта бўлади.

Ўткир Юсупов
Заҳирада ўтирган дарвозабонимиз қандай қилиб бизни чорак финалга олиб чиқиши мумкин? Бу плей-офф учрашуви ва унда ғолиб аниқланиши шарт. Агар асосий ва қўшимча дақиқаларда дуранг қайд этилса чорак финалга ким чиқишини пенальтилар серияси ҳал қилади. Игнатий Нестеров терма жамоамизнинг биринчи рақамли посбони, бунга шубҳа йўқ. Гуруҳ босқичида Нестеров Ўзбекистон терма жамоасини бир неча бор муқаррар голлардан қутқариб қолганини барча кўрди. Аммо Қўқон-1912 дарвозабони пенальтиларни қайтаришда омадлироқ ҳисобланади. 2018 йилги Суперлигада Юсупов дарвозасига 4та пенальти белгиланди ва шундан 3тасини посбон қайтаришга эришди.

Одил Аҳмедов
Жамоамиз сардори Уммон билан учрашувда ғалабамиз сабабчиларидан бири бўлди. Биз учун қийин ўтаётган баҳсда битта аниқ зарба билан вазиятни ўзгартириб юбора олди. Аҳмедов бир неча бор терма жамоамиз жонига оро кирган, буни мухлислар яхши билишади. Япония билан баҳсда Купер Аҳмедовга ҳордиқ чиқариш имконини яратиб берди. Австралия билан ўйинда Аҳмедов икки карра иштиёқ билан майдонга тушади. Сабаби у 2011 йил Қатардаги Осиё Кубогида Австралияга қарши ўйнаган ва 0:6 ҳисобида мағлуб бўлган эди.

Эктор Купер
Айни пайтда жамоамиз устозининг тажрибасига ҳеч ким шубҳа қилмаса керак. Японияга қарши баҳсдан олдин рақиб танламаслигини, Осиё Кубогини ютиш учун ҳар қандай рақибни мағлуб этиш кераклигини айтди. Япония билан баҳсда ҳатто бир қанча етакчиларга дам берди. Деярли ярим йилдан буён Ўзбекистонни бошқараётган Купер учун энг муҳим баҳс эртага бўлади. Тўғри бу мураббий фаолияти давомида 8 марта финалда мағлуб бўлган. Бироқ эртага финал эмас, нимчорак финал эканини унутманг.

Балки умуман бошқа футболчи туфайли чорак финалга чиқармиз. Шахсан менга фарқи йўқ, эртага Австралияни мағлуб этсак бўлгани.

Manba: zamin. uz