Адлия органларида коррупциянинг ҳар қандай кўринишларига нисбатан ноль даражадаги тоқатсизлик эълон қилинган

Адлия вазирлигида бўлиб ўтган йиғилишда вазир шу фикрни қайд этар экан, аҳолидан ноқонуний пул ундирилишига, ноқонуний бузиш ишларига чек қўйилишини ҳам маълум қилди.

Адлия тизимида коррупцияга қарши курашиш кескин кучайтирилган. Яъни адлия органларида коррупциянинг ҳар қандай кўринишларига нисбатан ноль даражадаги тоқатсизлик эълон қилиниб, бу борада идоравий дастур қабул қилинган эди.

Аммо аҳолидан тамагирлик билан пул ундиришга ўрганиб қолган айрим нотариуслар вазирлик раҳбариятининг бундай қатъий талабига тоқат қилолмаяпти. Ошкора порахўрликнинг оқибати вой бўлишини билган баъзи устомонлар энди кассага тўланадиган пулни ошириб кўрсатиб, шу йўл билан манфаатдор бўлиш йўлини ўйлаб топишди.

Самарқанд вилоятининг Пастдарғом тумани давлат нотариуси фуқаронинг сотиб олган Дамас русумли автомашинасини расмийлаштириб бериш учун ундан 1 миллион 72 минг сўм ундирган. Лекин фуқарога буни тасдиқловчи ҳеч қандай ҳужжат тақдим этмаган. Энг ёмони, шу биргина ҳолатда нотариус фуқародан 353 минг сўм ортиқча пул ундирган.

Ушбу ҳолат содир бўлганда кейин ушбу нотариус фаолияти кузатувга олинган. Афсуски, юқоридаги манзара мунтазам такрорланаётгани ўз исботини топган. Бироқ, нотариус қилмишларини тан олмай, юқори ташкилотларга ўз манфаатига қаратилган мурожаат уюштириш билан шуғулланган.

Бу нохуш ҳолат Адлия вазирлигининг чорак якунлари таҳлилига бағишланган йиғилишида тилга олинди.

Адлия вазири Русланбек Давлетов айнан шу ҳолатни кўзбўямачиликнинг энг юқори чўққиси, бу , деб баҳолади. Бунга, албатта, қонуний баҳо берилади. Нотариат соҳасини тартибга солиш бўйича бошлаган ишларимиз охиригача етказилади. Аҳолини қийнайдиган бирорта нопок ходим қолмайди. Бу соҳани тубдан ислоҳ қилиш, шаффоф тизим яратиш учун 1,5 миллион доллар сарфлаш кўзда тутилган. Энг сўнгги замонавий техникалар нотарил идораларга ўрнатилади. Тўлиқ электрон навбат жорий этилади. Нотариал ҳаракат бўйича фуқаронинг телефон рақамига хабар юбориш амалиёти йўлга қўйилади. Аҳолидан хизмат ҳақи учун пул қабул қилиш фақат терминаллар орқали амалга оширилади. Бу бирор нотариус таниш-билишини навбатсиз қабул қилолмайди, фуқародан бир сўм пул ортиқча ундира олмайди, дегани. Биз халқ томонидамиз ва бу йўлдан ҳеч қачон ортга қайтмаймиз , - деди вазир.

Йиғилишда шу каби камчиликлар таҳлил этилиши билан бир қаторда бажарилиши зарур вазифаларга ҳам эътибор қаратилди. Жойларда Президент қарорлари ва қабул қилинган қонун ҳужжатларининг бажарилиши ҳолатини танқидий ўрганиб ва пухта таҳлил қилиб борилади.

Уй жой амнистияси бўйича амалга оширилаётган ишлар охирига етказилади, бу борада ҳокимликларнинг масъулиятини ошириш бўйича тизимли ишлар олиб борилади.

Турар жойларнинг ноқонуний бузилиш ҳолатларининг олдини олиш бўйича чоралар кўрилади.

Жамиятда ҳуқуқий маданиятни юксалтириш концепцияси, шунингдек, давлат дастурлари доирасида муҳим аҳамиятга молик масалалар бўйича манзилли тарғибот ишлари яна кучайтирилади.

Ижтимоий соҳа ходимлари, айниқса ёшлар ва ногиронлиги бўлган шахслар ўртасида олиб борилаётган ишлар давом эттирилади. Давлат хизматлари соҳасида фуқароларга кўрсатилаётган хизматлар сифати ва турлари янада оширилади.

ЎзА