"Женоа" Элдор Шомуродов билан янги махсус интервьюни ҳавола этди (ВИДЕО)

"Женоа" жамоасининг расмий каналида Элдор Шомуродовнинг мухлиси, россиялик 13 ёшли ҳаваскор шарҳловчи Максим Истомин олган интервьюси эълон қилинди. Ушбу интервьюни ўзбек тилида эътиборингизга ҳавола этамиз.

– Салом, Элдор, салом, мухлислар. Биринчи саволим, сизнинг исмингиз Эльдор ёки Элдор?

– Элдор.

– Сиз футбол ўйнашни неччи ёшда бошлагансиз? Дастлаб қайси позицияда ўйнагансиз? 

– Мен 6-7 ёшимда футбол ўйнашни бошлаганман. Биз футболчилар оиласимиз десам ҳам бўлади. Отам, икки тоғам, акам футболчи. Оиламизда ҳамма футболга қизиқади. Шуни учун ҳам мен футболга қизиқиб кетганман.

Кўпчилик менга отам яхши ҳужумчи бўлганини айтади. Шунинг учун мен ҳам ҳужумчи бўлишни орзу қилганман.

– Сиз дастлаб "Ростов"да ҳимоячи ўрнида майдонга тушган эдингиз, кейин ҳужумчи бўлиб чиқдингиз ва дарров муваффақият қозондингиз. Бу қандай содир бўлганди?

– Ҳозир сизни ҳайрон қолдираман – мен ҳеч қачон ҳимоячи бўлмаганман. Ҳа, лекин, қайсидир ўйинда мураббий мени ҳужумчи-ҳимоячи сифатида майдонга чиқарганди. Терма жамоада 1-2 йил ярим ҳимояда ўйнаганман.

– Оилангиз билан муносабатларингиз қандай? Уларни соғинасизми?

- Оиламиз жуда катта, байрамларни бирга ўтказишга ҳаракат қиламиз. Ҳаммамиз йиғилганимизда катта жамоа бўламиз. 

Сўнгги вақтларда уйга келганимда биз бутун оила бўлиб футбол ҳам уйнаймиз. Ўзимизнинг 7 кишилик иккита жамоамиз бор, мини-футбол ўйнаймиз. Оиламизда футболчилар кўп бўлгани учун яхши футболчилар кўп. Шуни учун ҳар доим ҳам менинг иштирокимдаги жамоа ғалаба қозонавермайди. Мен ҳозир ана шундай учрашувларни жуда соғинганман.

– "Женоа"да нима сабабдан "61" рақамини олишга қарор қилдингиз?

– Бу ерга келганимда "14" рақами банд эди. Қайси рақамни олишни ўйлаб турганимда, менинг бир дўстим "61 рақамни олсанг, Ростовдаги мухлисларинг хурсанд бўлишади", деб маслаҳат берди (Россия вилоятлари рўйхатида Ростов 61-ўринда). Шундан сўнг "61" рақамини олишга қарор қилдим.

– Сиз болаликдан учрашишни орзу қилган футболчи борми?

– Мен ҳар доим айтганман, кумирим Фернандо Торрес ва Дидье Дрогба. Мен улар билан учрашиб, дастхат олсам, хурсанд бўлардим.

– "Женоа" клубида кимнинг ўйини сизга ёқади?

– "Женоа"да ҳамма топ ўйинчилар йиғилган. Улар жамоа бўлиб ўйнаганда янада яхшироқ натижа кўрсатади.

– Ёш футболчиларга қандай маслаҳат берган бўлардингиз? Энг муҳими нима?

- Энг муҳими - ҳар доим футбол ҳақида ўйлаш. Агар сен футболни танлаган бўлсанг, футбол хақида ўйлаш керак, кўпроқ иш бажаришга ҳаракат қилиш керак. Ўзига ишониш ва кўйилган мақсад сари интилиш керак.

– Демак, асосийси кўпроқ ишлаш керак?

- Ҳа, диққат билан, қунт билан ишлаш керак. Футболда арзимас нарса йўқ. Ҳар бир нарсага эътибор бериш лозим.

– Футболдан бўш вақтингизда нима билан шуғулланасиз?

– Ҳозир бўш вақтим жуда кам. Ота-онам билан гаплашаман, италянча гаплашишни ўрганяпман.

– "Женоа"да ўзбек ресторани топдингизми?

– Йўқ, бу ерда ўзбек ошхонаси йўқ. Лекин менга италия овқатлари ҳам ёқди. Айниқса, ризотто.

– "Ростов"дан сўнг Генуя ҳақида таассуротларингиз қандай?

– Яхши, бу ер жуда чиройли тарихий шаҳар экан, денгиз ёнида. Мен Монте Пеш деган жойда бўлдим. У ердан бутун Генуя кўринади. Бу ерда ҳам одамлар футболни яхши кўради, "Женоа"га мухлислик қиладиганлар кўп.

– Сизда "Женоа"даги биринчи муваффақиятли узатмангиз, биринчи голингиз ҳақида қандай таассурот қолди?

– Мен кечаги кун билан яшамасликка ҳаракат қиламан, бўлиб ўтган ўйинни тезроқ унутаман. Гол урсам, узоғи билан бир кун эслаб юраман, кейин унутаман. Янги ўйинга тайёргарлик кўраман.

– Келажакда қандай режаларингиз бор?

- Мен футболчи сифатида ўсишга ҳаракат қиляпман, қўлимдан келган барча ишни қилишга, ғалаба қозонишга интиламан. Жамоа билан бирор соврин (кубок)  ютиб олишга уринаман. Асосий мақсадим эса Ўзбекистон терма жамоаси билан жаҳон чемпионатига чиқиш..

– Яқинда ота бўлингиз. Нималарни ҳис қилаяпсиз?

- Бунга ҳалиям ишонгим келмайди. Жуда хурсандман. Унга қараб туриб ўзимни кўргандек бўламан. Фарзандим туғилганига бугун 25 кун бўлди. Улар ҳозир Тошкентда.  Яқинда келиши керак. Уни жуда соғиндим.

– Футбол шарҳловчиси бўлишни истайсизми?

- Мен кўп гапиришни унча ёқтирмайман, шунинг учун мендан шарҳловчи чиқмаса керак. Лекин сиз жуда яхши уддалаяпсиз.

– Раҳмат, сизга катта муваффақиятлар тилаймиз.