Испанияда коронавирус қурбонлари хотирасига ўн кунлик мотам эълон қилинади

Сешанба куни Испанияда коронавирус эпидемияси қурбонлари хотирасига ўн кунлик мотам эълон қилинади.

"Биз асрнинг энг ёмон балосини тўхтатдик. Олдинда мамлакатимизни тиклаш вазифаси турибди. Ҳукумат сешанбадан бошлаб мотам эълон қилиш тўғрисида расмий баёнот қабул қилади. Мотам ўн кун давом этади ва байроқлар туширилади. Бу билан биз жабрланганларга ўз эътиборимизни кўрсатамиз", - деди Испания бош вазири Педро Санчес.

18 майдан қиролликнинг аксарият жойларида пандемия сабабли киритилган чеклов чораларини юмшатишнинг янги босқичига ўтилди.

Ушбу босқичда яқин кишилар билан учрашишга, маълум бир чекловлар асосида қаҳвахона ва барларнинг айвонлари, меҳмонхона ва музейларни очишга рухсат берилди.

Испанияда 282 мингга яқин кишида коронавирус аниқланган бўлиб, 28,6 мингдан ортиқ киши вафот этган.