Tramp: Isroil va Eron o‘rtasidagi urush yana boshlanishi mumkin

AQSh prezidenti Donald Tramp NATO sammitida (Gaaga shahrida) Isroil bilan Eron o‘rtasidagi urush yakunlanganini va tomonlar sulhdan mamnunligini ma’lum qildi. Biroq u shuni ham ta’kidladi: "Qachondir" bu mojaro yana boshlanishi mumkin.

"Biz urush tugagan, deb hisoblaymiz. Menimcha, ular bir-biriga yana hujum qilmaydi", — dedi Tramp jurnalistlarga sammit chog‘ida. U har ikki tomon “mamnun” ekanini va “uylariga qaytishlari mumkinligini” qo‘shimcha qildi, urush esa “og‘ir” va “shafqatsiz” zarbalar bilan kechgani bois tomonlar charchagani aytildi.

Shu bilan birga, AQSh prezidenti mojaroning qayta boshlanishi ehtimolini istisno qilmadi: "Yana boshlanishi mumkinmi? O‘ylaymanki, qachondir mumkin. Ehtimol, yaqin orada ham boshlanishi mumkin".

Trampning aytishicha, urush AQShning Eron yadro ob’ektlariga bergan zarbalari natijasida to‘xtagan. U bu zarbalar Eronning yadroviy dasturini "tubdan yo‘q qilgani"ni va "yillar orqaga surib qo‘ygani"ni ta’kidladi. Tramp bu harakatni "Amerikaning tiyib turish qobiliyatiga bo‘lgan ishonchni tiklash" deb baholadi.

Keyingi haftada Eron bilan muzokaralar rejalashtirilgan bo‘lib, ehtimoliy bitim imzolanishi mumkin. Ammo Tramp bu bitimning zarurligiga shubha bildirdi: “Menimcha, bu unchalik muhim emas”. Uning so‘zlariga ko‘ra, Eron “o‘z tinchligiga qaytmoqda”, shuningdek, yadroviy kelishuv kerakmi yo‘qmi — bunga befarqligini bildirdi.

Tramp AQSh zarbalarini “tezkor” va “kuchli” deb atadi hamda Eron yadroviy materiallarni ko‘chirishga ulgurmaganini ta’kidladi. Tehron rasmiylari hozircha yadroviy dastur haqidagi bu bayonotlarga izoh bermadi.