Xabaringiz bor, joriy yilning 27 may kuni O‘zbekiston Respublikasining Birinchi Prezidenti Islom Abdug‘aniyevich Karimovning turmush o‘rtog‘i Tatyana Akbarovna Karimovaning vafot etgani haqida ijtimoiy tarmoqlar va xalqaro saytlarda xabarlar tarqatilgan edi. Ko‘p o‘tmay bu ma’lumot yolg‘on bo‘lib chiqdi.
Oradan 13 kun o‘tib, ya’ni 9 iyundan 10 iyunga o‘tar kechasi yana mazkur shum xabar bolaladi. Xabar o‘z tasdig‘ini topmadi.
Ko‘plab shov-shuvlardan so‘ng, Tatyana Akbarovna Karimova bugun, 10 iyun kuni sog‘ salomatligini ifodalash maqsadida ko‘rinish berdi.
O‘zbekiston Respublikasining Birinchi Prezidenti Islom Abdug‘aniyevich Karimovning turmush o‘rtog‘i Tatyana Akbarovna Karimova bugun, 10 iyun kuni Islom Karimov nomidagi Respublika xayriya jamoat fondining chet elda ta’lim olish grantlari stipendiatlari – Muzaffar Maksumov, Aleksandra Kim, Gulyuzbonu Ro‘ziboyeva va Stefaniya Abbosovalar bilan O‘zbekistonning Birinchi Prezidenti hayoti va faoliyatiga bag‘ishlangan ko‘rgazmada uchrashdi.
O‘z so‘zlarida Tatyana Akbarovna yoshlarga ilg‘or chet el o‘quv maskanlaridagi o‘qishlarida omad, egallagan bilimlarini Vatanimiz ravnaqi yo‘lida qo‘llashlarini tiladi.
Eslatib o‘tamiz, so‘nggi bir yarim yil ichida o‘zbekistonlik 23 nafar yigit-qizlar Karimov Fondining tahsil grantlarini qo‘lga kiritib, magistratura dasturi bo‘yicha Yevropaning yetakchi oliy o‘quv yurtlarida ta’lim olish imkoniyatiga ega bo‘ldilar.
Manba: qalampir.uz
