Samarqand triatlon bo‘yicha Osiyo kubogiga mezbonlik qiladi

Samarqand shahri ko‘rkiga ko‘rk qo‘shib turgan “Boqiy shahar” majmuasi atrofida 30dan ortiq mamlakatning 70 nafar atleti Parij-2024 olimpiadasiga qimmatli reyting ochkolarini qo‘lga kiritish uchun musobaqalashadi

Joriy yilning 8-9-oktyabr kunlari ko‘hna va navqiron Samarqand shahri yana bir yirik sport tadbiriga mezbonlik qiladi. Jumladan, 8-oktyabr kuni Samarqandda barpo etilgan muhtasham “Boqiy shahar” majmuasi atrofida, eshkak eshish kanali bo‘yida triatlon bo‘yicha Osiyo kubogi musobaqasi o‘tkaziladi.

Shu munosabat bilan, bugun poytaxtimizdagi “Hilton” mehmonxonasida mazkur musobaqaga bag‘ishlangan matbuot anjumani tashkil etildi. Unda Sportni rivojlantirish vaziri o‘rinbosari Shahrullo Mahmudov, Milliy Olimpiya qo‘mitasi Bosh kotibi Oybek Kasimov, O‘zbekiston triatlon federasiyasi Bosh kotibi Yelena Kun hamda terma jamoamizning yetakchi a’zosi Aleksandr Kurashov, shuningdek OAV xodimlari ishtirok etishdi.

Matbuot anjumanida “Nega Osiyo kubogi bahslarini o‘tkazish uchun aynan Samarqand shahri tanlandi?”, degan savolga esa O‘zbekiston triatlon federasiyasi bosh kotibi Yelena Kun shunday javob berdi:

- Xalqaro talablarga javob beradigan eshkak eshish kanalida triatlonning ochiq havzada suzish musobaqalarini tashkil etish uchun barcha sharoitlar yaratilgan. Qolaversa, ushbu sport majmuasi atrofidagi yugurish va velosport musobaqalarini o‘tkazishga mos keladigan yo‘laklar ham xorijlik mehmonlarni xushnud etishiga ishonaman. Mana shunday sharoitlarga ega majmuadan foydalanmaslik, sportga xiyonat va Samarqandda ushbu musobaqa yuqori saviyada tashkil etilishiga ishonaman.

Darvoqe, bu yilgi musobaqalarda qatnashish istagini bildirgan sportchilar o‘tgan yilgiga qaraganda 3 baravar ko‘payganligi Osiyo kubogining nufuzi tobora ortib borayotganidan darak beradi.