Rossiya Shimoliy Koreyaga neft yetkazib beradi. Bu nima evaziga?

KXDR Rossiyadan olgan neft hajmi 1 million barreldan oshdi. Bu Pxenyanga sanksiyalar joriy etilganidan beri kuzatilmagan barqarorlik darajasini ta’minlaydi, deb yozadi BBC Open Source Centre tadqiqot markazi hisob-kitoblariga tayanib.

Tahlilchilarga ko‘ra, so‘nggi sakkiz oy ichida Shimoliy Koreyaning o‘ndan ortiq tankerlari Uzoq Sharqdagi Rossiya neft terminali va Shimoliy Koreya portlari o‘rtasida 43 marta qatnovni amalga oshirgan. Sun’iy yo‘ldoshdan olingan suratlar shuni ko‘rsatadiki, 7 martdan boshlab bu tankerlar Rossiyaga bo‘sh borib, yuklangan holda qaytib kelgan. Ushbu parvozlarning oxirgisi 5 noyabr kuni Shimoliy Koreya qo‘shinlari Kursk viloyatiga jo‘natilgani haqidagi xabarlardan so‘ng qayd etilgan.

Pxenyan yadroviy qurol ishlab chiqargani uchun xalqaro sanksiyalar ostida. Mamlakatga yiliga 500 ming barreldan ortiq neft sotib olish taqiqlangan. Shu bilan birga, 1 million barrel yoki 56 ming tonna Rossiya Federasiyasi uchun ahamiyatsiz hajm bo‘lib, rasmiy ma’lumotlarga ko‘ra, bir kunda deyarli o‘n baravar ko‘p ishlab chiqariladi.

Avvalroq Britaniyaning The Times gazetasining G‘arb razvedkasidagi manbalari Shimoliy Koreya Rossiyaga yiliga 3 millionga yaqin snaryad yetkazib berishini ma’lum qilgandi – bu Rossiya armiyasi Ukrainaga qarshi urushda ishlatadigan o‘q-dorilarning yarmini tashkil etadi.