Rossiya raketa bazasidagi avariyadan so‘ng osmon binafsha rangga bo‘yaldi

Rossiyaning Orenburg shahri yaqinidagi raketa bazasida sodir bo‘lgan kuchli portlashdan osmonda binafsha rang bulut yuzaga keldi.

Orenburg viloyatidagi strategik raketa qo‘shinlari bazasi hududida kuchli portlash sodir bo‘lgani haqida Rossiyaning “Ural56” portali va Qozog‘istonning ArbatMedia nashri guvohlarga tayanib xabar berdi.

Defence Express axborot-konsalting kompaniyasining yozishicha, portlashga RS-28 “Sarmat” qit’alararo ballistik raketasini uchirish chog‘ida yuz bergan avariya sabab bo‘lishi mumkin.

Portlash Rossiyaning Qozog‘iston chegarasiga yaqin bo‘lgan Yasnoye shahrida sodir bo‘lgan. Guvohlarning aytishicha, ular kuchli portlash ovozini eshitgan, shundan keyin hudud osmonida binafsha rang tutun buluti paydo bo‘lgan. Defence Express tahlilchilariga ko‘ra, bunday rang faqat “amil” va “geptil” kabi o‘ta zaharli yoqilg‘i juftligidan foydalaniladigan raketalarga xos.

Yasnoyeda “Avangard” gipertovushli raketa majmualari joylashtirilgan. Bu yerda uzoq masofaga mo‘ljallangan, jumladan yadro kallakli yer usti raketalarini uchirish imkonini beruvchi start maydonchasi mavjud.