Ronaldu JCH-2026da yaxshi formada ishtirok etishi uchun qaysi klubda o‘ynab turmoqchi ekani ma’lum bo‘ldi

“An-Nasr”ning Osiyo Chempionlar Ligasi yarim finalidagi mag‘lubiyati ortidan Krishtianu Ronalduning kelajagi yana e’tibor markazida bo‘lib turibdi. Portugaliya matbuotining xabariga ko‘ra, 40 yoshli hujumchi faoliyatini boshlagan klub — “Sporting”ga qaytish haqida o‘ylamoqda.

Bu yangilik Lissabon klubi hujumchisi Viktor Gyokereshning boshqa klubga o‘tishi haqidagi mish-mishlar fonida tarqaldi.

Ronalduning asosiy maqsadi — 2026 yilgi mundialga yaxshi sport formasida borish. “Sporting” rahbariyati ham Ronalduning qaytishi haqidagi xabarlarga ijobiy fikr bildirgan. Bu klub uchun tijoriy jihatdan ancha foydali bo‘lishi mumkin.

Ronalduning ketish qarori “An-Nasr”ning yomon o‘tkazayotgan mavsumi sabab qabul qilingani aytilmoqda. Klub Osiyo Chempionlar Ligasi yarim finalida “Kavasaki Frontale”ga 2:3 hisobida mag‘lub bo‘lib, final yo‘llanmasidan mahrum bo‘ldi. Himoyadagi xatolar va o‘tkazib yuborilgan gollar jamoaga qimmatga tushdi. Bundan tashqari, “An-Nasr” Saudiya Qirol kubogidan ham erta chiqib ketdi. Shuningdek, Pro Liga turnir jadvalida “Al-Ittihod”dan 8 ochko ortda qolgan holda 3-o‘rinda bormoqda.

Ronaldu joriy mavsum 33 ta gol va 4 ta assist muallifiga aylangan. Uning klub bilan shartnomasi 2025 yilning iyun oyi oxirigacha amal qiladi. Transfermarkt portali hujumchining qiymatini 12 million yevroga baholagan.