Rasman: Enrike Rikelme «Real» prezidentligi uchun kurashni boshlaydi

Enrike Rikelme «Real» prezidentligi lavozimiga nomzod sifatida rasman tasdiqlandi.

«Madrid» klubi xabar berishicha, Rikelme barcha zarur bank kafolatlari va kerakli hujjatlarni taqdim etgan.

Avvalroq Florentino Peresning saylovdagi raqibi ispaniyalik banklar bilan muammolarga duch kelgani xabar qilingandi. «Cox Energy» energetika kompaniyasi rahbari «Banco Santander» va «BBVA» banklaridan zarur moliyaviy kafolatlarni ololmagan edi. Bu rad javobi klubning amaldagi rahbari tomonidan bosim o‘tkazilganligi bilan izohlangan. Peres mazkur ikki bank bilan yaqin hamkorlik qiluvchi «Grupo ACS» qurilish kompaniyasi egasi hisoblanadi.

Shu sababli, Rikelme xorijiy banklar — «Scotiabank» va «Andbank» bilan kelishuvga erishishga urinib ko‘rdi. Yakunda «Andbank» allaqachon kafolat xatini taqdim etishga muvaffaq bo‘ldi.