«Spartak» klubidagi yarim yillik faoliyatidan keyin yana «Ufa» klubiga qaytgan Oston O‘runovning boshqirdistonliklar safida qaysi raqamda to‘p surishi ma’lum bo‘ldi.
Klub matbuot xizmati xabariga ko‘ra, o‘zbekistonlik futbolchiga 10-raqamli futbolka topshirilgan. O‘runov 2020 yilgi mavsumda «Ufa» safida 6-raqam ostida to‘p surgandi, ammo hozirda ushbu raqam boshqa futbolchiga tegishli ekani sababli Oston 10-raqamni tanlagan.
Ma’lumot uchun, huquqiy jihatdan «Spartak» klubiga tegishli bo‘lgan Oston O‘runov yarim mavsumga «Ufa»ga ijaraga berildi.
Avvalroq, «Ufa» O‘runov transferi uchun «Spartak»ka 1 million yevro taklif qilgani, Moskva jamoasi esa 3 million yevro so‘ragani haqida xabar qilingandi.