Nima uchun ijodiy imtihon va magistratura javoblari e’lon qilinmayapti?

Bugun 25 avgust, yangi o‘quv yiliga sanoqli kunlar qoldi. Ammo haligacha bakalavrda ijodiy imtihon asosida qabul bo‘ladigan yo‘nalishlar hamda magistraturaning yakuniy natijalari e’lon qilinmadi.

1 mln nafarga yaqin abituriyentlarning test natijalarini e’lon qilish 1 kunga kechikkani uchun qaaaancha e’tirozlarga sabab bo‘lganini ko‘rdik. Ammo nima uchun shuncha paytdan buyon ijodiy imtihon va magistratura javoblari e’lon qilinmayapti? Cho‘zishdan maqsad nima? Hech bo‘lmasa natijalar nima uchun kechikayotgani haqida xalqqa ochiq-oydin tushuntirish bersa bo‘lmaydimi?

Olingan norasmiy ma’lumotlarga ko‘ra, bunda ham xuddi testlar bilan bog‘liq holat takrorlanayotgan ekan. Ya’ni yakuniy natijalar allaqachon tayyor, ammo Davlat qabul komissiyasining tasdiqlab berilishi kutilmoqda... Qancha kutiladi, bunisini bilmadim.

Va imkoni bo‘lsa, ijodiy imtihonlar yoki magistraturaning yakuniy natijalarini internet orqali ko‘rish imkoniyatini yaratish kerak (hech bo‘lmasa, natijalarni Pdf shaklida yuklab). Abituriyentlar albatta OTMga borib, ilingan qog‘ozlarga qarab kelishga majbur bo‘lmasligi kerak.