Endi o‘qituvchilarni maktab qurilishi va ta’mirlanishi ishlariga jalb qilish qat’iy taqiqlanadi

O‘zbekistonda o‘qituvchilarni maktab qurilishi va ta’mirlanishi, infrastrukturasini yaxshilash ishlariga jalb qilinishi qat’iy taqiqlanadi. Bu haqda 2019 yil 23 avgust kuni Yoshlarni vatanparvarlik ruhida tarbiyalash va jamiyatda o‘qituvchi mavqeini oshirish chora-tadbirlari to‘g‘risida kengaytirilgan tarzda o‘tkazilgan 34-sonli yig‘ilish bayonida aytilgan.

Belgilanishicha:

mamlakat kelajagi bo‘lgan yosh avlod ta’lim va tarbiyasi eng muhim vazifa ekanligini inobatga olib, barcha vazirlik, idora va mahalliy hokimliklar rahbarlari Xalq ta’limi vazirligi hamda uning hududiy tuzilmalariga doimiy amaliy yordam ko‘rsatadi;

xalq ta’limi tizimi rahbarlari va xodimlari, shu jumladan o‘qituvchilar, maktablarda ta’lim va tarbiya jarayonlariga, o‘qitishning mazmun va sifatiga javobgardir, ularni maktab qurilishi va ta’mirlanishi, infrastrukturasini yaxshilash ishlariga jalb qilinishi qat’iy taqiqlanadi;

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tegishli hududlarda maktablarning moddiy-texnika bazasi holatini yaxshilash va kuz-qish mavsumiga tayyorgarligini sifatli tashkil etishga mas’uldirlar.

O‘zbekiston Respublikasi Oliy Majlisi Senati (Norboyeva), Qonunchilik palatasi (Ismoilov), Vazirlar Mahkamasi (Aripov) “Ta’lim to‘g‘risida”gi qonunning yangi tahririni qabul qilishni tezlashtirish bo‘yicha amaliy choralarni ko‘radi.

Belgilab qo‘yilishicha, yangi qonun “to‘g‘ridan-to‘g‘ri amal qilish” tamoyili asosida bo‘lib, unda pedagogning maqomi, huquq va imtiyozlari aniq ko‘rsatib beriladi.