Dehqonobod hokimi Zoir Aliqulov seldan zararlanishi oqibatida foydalanish uchun xavfli ko‘rinish kasb etayotgan ko‘prik holatini ko‘zdan kechirdi. Bu haqda tuman hokimligi axborot xizmatiga tayanib, "nnews.uz" xabar bermoqda.
Tuman hokimi Bozortepa qishlog‘ini Zoqqoya hamda Qo‘shquduq qishloqlari bilan bog‘lovchi ko‘prikni borib ko‘rgan.
“Mazkur ko‘prik ta’miri uchun mablag‘ ajratish masalasini ko‘rib chiqib, aholidan bu haqda shikoyat bo‘lmasidan oldin muammoni bartaraf etishimiz lozim”, — dedi tuman hokimi Zoir Aliqulov.
Ma’lum bo‘lishicha, 1990 yillarda qurilgan mazkur ko‘prikning Zoqqoya qishlog‘idan Bozortepa qishlog‘iga kirish qismida yemirilish paydo bo‘lgan. Ko‘prik ustunining bir qismi sel oqibatida zararlangan.
Eslatib o‘tamiz, Zoir Aliqulov Dehqonobodda hokim sifatida ish boshlaganidan buyon tumanda 30 ga yaqin ko‘prik qurildi va ta’mirlandi.