Ayrim qishloq xo‘jaligi texnikalari bojxona boji va utilizasiya yig‘imidan ozod qilinadi

O‘zbekiston Respublikasi Prezidentining “Qishloq xo‘jaligini mexanizasiyalash darajasini yanada oshirish chora-tadbirlari to‘g‘risida”gi qarori (PQ-431-son, 12.12.2024 y.) qabul qilindi.

Qarorga ko‘ra, 2025 yil 1 yanvardan, qishloq xo‘jaligi texnikalari yetkazib berishda amaldagi qonunchilikka muvofiq qo‘llaniladigan imtiyozlar (subsidiya, soliq va bojxona imtiyozlari va moliyaviy yordamlar) faqat mahalliy ishlab chiqaruvchilar va dilerlar orqali muomalaga chiqariladigan qishloq xo‘jaligi texnikalariga nisbatan tatbiq etiladi.

2027 yil 1 yanvargacha quyidagilar bojxona bojidan va utilizasiya yig‘imidan ozod qilinadi:

• belgilangan talablarga javob beradigan paxta terish kombaynlari, o‘ziyurar ozuqa yig‘uvchi va bog‘dorchilik kombaynlari, ko‘chat ko‘mish va ochish texnikalari;
• mahalliy ishlab chiqaruvchilar va dilerlik xizmati tomonidan xorijdan olib kelinadigan yangi paxta terish kombaynlari, o‘ziyurar ozuqa yig‘uvchi va bog‘dorchilik kombaynlari, ko‘chat ko‘mish va ochish texnikalari.

2025 yil 1 martdan imtiyozlardan foydalangan holda xarid qilingan, shu jumladan, respublikada ishlab chiqarilgan va import qilingan yangi traktorlar va kombaynlarni ularga GPS qurilmasini o‘rnatmagan holda davlat ro‘yxatidan o‘tkazish va ulardan foydalanish taqiqlanadi.

2028 yil 1 yanvardan asosiy paxta va g‘alla hosili uchun paxta chigiti va bug‘doyni ekishda aniq donalab ekmaydigan seyalkalardan foydalanish taqiqlanadi.