Ayrim mahallalarga «qo‘riqlash xizmati inspektori» lavozimi kiritiladi

Prezidentning PQ–360-son qaror bilan Milliy gvardiyadan IIV tizimiga qaytarilgan Qo‘riqlash departamentiga qo‘riqlanadigan ob’ektlarga o‘rnatilgan qo‘riqlashning texnik vositalari va tizimlariga xizmat ko‘rsatish huquqi beriladi.

Mahallalarda qo‘riqlash bo‘linmalariga yuklatilgan vazifalarni samarali tashkil etish maqsadida kriminogen vaziyat og‘ir hududlardagi mahalla huquq-tartibot maskanlari tuzilmasiga qo‘riqlash xizmati inspektori lavozimi kiritiladi.

Kriminogen vaziyati og‘ir hududlarda, turistik infratuzilma ob’ektlarida hamda ommaviy dam olish joylarida Departamentning qo‘riqlash-patrul xizmati naryadlari tashkil etiladi.

Quyidagilarni nazarda tutuvchi «Xavfsiz ta’lim» konsepsiyasi joriy etiladi:

• davlat ta’lim muassasalari, nodavlat ta’lim tashkilotlari va xorijiy davlatlar ta’lim tashkilotlari filiallarining xavfsizligini shartnoma asosida jismoniy va texnik qo‘riqlash tizimlari orqali ta’minlash;
• Departament tomonidan shartnoma asosida ta’lim muassasalariga qo‘riqlash signalizasiyalari, tashvish tugmalari, videokuzatuv moslamalarini o‘rnatish va ularga texnik xizmatlar ko‘rsatish.